فى ليلة من ليالى رأس السنة اتعزمت صباح على حفلة تنكرية.. ويومها قررت أنها تتنكر فى لبس خدامة وعملت مكياج وركبت ضفاير

الهام سمير .. الحكواتى

فى ليلة من ليالى رأس السنة اتعزمت صباح على حفلة تنكرية.. ويومها قررت أنها تتنكر فى لبس خدامة وعملت مكياج وركبت ضفاير بحيث ان محدش يعرفها.. وفعلا لما راحت الحفلة محدش عرفها ولا حتى الست اللى وجهت لها الدعوة لدرجة أنها كانت بتسألها أنتى مين وجاية مع مين..

المهم أنه على الساعة واحدة صباحا فكرت صباح انها ترجع شقتها تغير هدومها وتلبس فستان جديد وترجع بيه الحفلة.. ويدوب نزلت السلم ووصلت باب العمارة لقت البواب بيسألها “انتى مين يا بت ورايحة فين.. وبتشتغلي عند مين؟” ولما رفضت صباح انها تجاوب بدأ يعلى صوته لحد ما اتلم السواقين اللى كانوا واقفين تحت مستنيين الضيوف اللى فى الحفلة .. واتفق الكل على انهم لازم يبعتوا يجيبوا الشاويش علشان ياخدها على القسم.. وهنا اضطرت صباح انها تكشف عن شخصيتها الحقيقة وسط تصفيق حاد ومطالبات بإنها تغنى لهم حاجة على ذوقها..