عايزة احكى مشكلتى
من 8 شهور اتطلقت و معايا طفل 4 سنين بعد زواج 5 سنين
حاولت أعرف ايه سبب الطلاق اتقالى الظروف صعبة و محدش حمل بيت و عيال و مصاريف مع العلم أنا دكتورة و طليقى كان دكتور بردو و كانت عيشتنا كويسة مااحتجناش لحد الحمد لله.. لكن من وقت ما بدأت الحرب بين روسيا و اوكرانيا و الحياة اتبدلت بقا رسايله كلها ليا عبارة عن الحروب و ان احنا هندخل ف ايام سودة و مش هنلاقى و خايف انى ابقي حامل تانى و فترة 6 شهور قبل الطلاق كنت مش عارفة ايه القلق الزيادة ده .. بعدها طلقنى و حاليا عدى 8 شهور ع الطلاق .. اخدت حقوقى المادية لكن أنا مكنتش عايزة اتطلق اصلا ولا كنت عايزة حاجة والله .. بيشوف ابننا كل اسبوع ب استمرار سواء رؤية او استضافة و بيدفع لى مبلغ نفقة كان اتفق عليه
بعد مرور 7 شهور البلوكات اللى عملهالى من قبل الطلاق اتشالت .. ممكن نتكلم عن معاد الرؤية ع الواتس ؟!
بعد ما كان بيحارب ع النفقة و انه مش هيدفع و هيدخلنى المحكمة .. كان ردى عليه أعمل اللى انت عايزه لانى لا عايزة محاكم ولا غيره اصلا أنا اتطلقت و مفهمتش أنا عملت ايه لحد دلوقتى ! لكن الكلام ملوش لزوم
بقيت اللى اطلبه لابنى يجيبه و بدأ يهتم بيه مع ان ايام الجواز مكانش كده .. مع العلم أنا اللى بروح الرؤية ب ابنى لانى مليش اخوات و والدى متوفى
بقيت برجع اسال نفسي هل ده طبيعى بين المطلقين ولا هو عايز يحسن صورته قصاد ابنه ولا هو ندمان أنا بقيت بستغرب جدا تصرفاته و مش قادرة افسرها خالص!
مع العلم أول ما طلقنى بعت رسايل انه هيتجوز تانى و كده لكن أنا كنت منهارة من صدمة الطلاق نفسه
جاوبونى أنا سنى صغير و للأسف خبرتى ف الدنيا قليلة.
ارسل قصتك لنشرها باسم رئيس التحرير وجدى وزيرى واتس ٠١١٥٥٤٤٢٨٨٣
