مرض السكر والتهاب الأعصاب
(الاعتلال العصبي السكري).
▪️يعد التهاب الأعصاب بأنواعه المختلفة من أهم مضاعفات مرض السكر و عدم ضبط نسبه السكر ف الدم سواء بعدم اخذ العلاج او عدم الانتظام او اختيار علاج غير مناسب من أهم اسباب حدوث هذا الالتهاب.
▪️مجرد الإصابة بمرض السكر بتزيد نسبه الإصابة بالتهاب الأعصاب بس لو كمان سكرك مش متضبط او بتدخن او وزنك زايد او فيه ارتفاع بوظائف الكلى او عندك سكر من فتره كبيره فنسب الإصابة بتزيد جدا.
▪️لازم تعرف معلومة هامه جدا أن ضبط السكر ف مستوياته المطلوبة بيمنع ظهور التهاب الأعصاب ف المصابين بالسكر من النوع الأول و يؤخر ظهور هذا الالتهاب جدا ف المصابين بالسكر من النوع الثاني.
فيه أكثر من نوع لالتهاب الأعصاب اللي بيحصل نتيجة مرض السكر:
1️⃣النوع الأول: هو التهاب الأعصاب الطرفية و دا دايما بيصيب الساقين اولا ثم اليدين و بتكون أعراضه اكتر بالليل و تشمل:
🔸 تنميل و حرقان.
🔸الألام شديده.
🔸ضعف ف الاحساس بالحرارة و البرودة.
🔸ف بعض الأحيان حساسيه شديده للمس لدرجه ان بعض الناس لا تتحمل وزن ملاءه السرير.
2️⃣النوع الثاني من التهاب الأعصاب و دا اسمه الالتهاب العصبي المستقلي او اللاارادي ودا أعراضه مهمه جدا منها :
🔸انخفاض بنسبه السكر ف الدم دون حدوث اعراض انخفاض السكر و ديه خطيره جدا.
🔸دوخه او إغماء عند النهوض من وضع الاستلقاء او الجلوس فجاه و دا بسبب انخفاض ضغط الدم.
🔸الشعور الدائم بامتلاء البطن و الغثيان و ممكن الترجيع نتيجة بطء إفراغ المعدة و أحيانا امساك بصوره مستمرة.
🔸مشكلات بالمثانة منها سلس البول و التهابات متكررة بمجري البول.
🔸سرعه بضربات القلب.
🔸مشكلات جنسيه منها ضعف الانتصاب لدي الرجال و جفاف المهبل لدي النساء.
3️⃣النوع الثالث اسمه التهاب الجذور العصبية
دا ف الغالب بيصيب منطقه الفخذين و الاليتين و ممكن الصدر و البطن و من أعراضه :
🔸آلام شديده ف الفخذين او الاليه.
🔸ضعف بعضلات الفخذ.
🔸عدم القدرة ع النهوض من وضع الجلوس.
🔸الم ف البطن او الصدر.
4️⃣النوع الاخير هو التهاب العصب الاحادي و دا بيصيب عصب محدد ممكن يكون ف الوجه أو الساق او الذراع ومن أعراضه :
🔸شلل ف جانب واحد من الوجه.
🔸آلام ف الجهة الأمامية للفخذ.
🔸زغلله ف العينين.
🔸ضعف ف اليد و سقوط الاشياء منها.
▪️كل الأعراض ديه ممكن تؤدي لمضاعفات خطيره لكن يمكن من اهمها بتر اصبع من أصابع القدم او القدم، سلس البول و التهاب المتكرر للجهاز البولي، انخفاض السكر دون وجود اعراض لانخفاض السكر ، انخفاض حاد بضغط الدم.
▪️الأعراض كتير و بعضها بياثر ع حياتك اليوميه و يمكن بعضها بيخلي بعض المرضى مش عارفين يناموا و الحل سهل و هو انك تحاول تحافظ ع ضبط مستوى السكر ف جسمك باتباع نظام غذائي و الرياضه و الالتزام بالعلاج الموصوف لك من قبل الطبيب و متابعه طبيبك باستمرار و فيه ادويه كتير بتساعد ف علاج التهاب الأعصاب ممكن تتوصف لك بس طبعا الوقاية خير من العلاج.
د. مروان الحسيني
دكتوراه الأمراض الباطنية -جامعة عين شمس
استشاري الأمراض الباطنية و السكر و الجهاز الهضمي و الكبد بالمركز الطبي للمقاولين العرب و مستشفى م. نصر للتأمين الصحي.
