ساعات نقدر……ساعات لأ.
وقلوبنا من الألم تنشق.
ساعات في حلمنا نعافر….
ويتعب قلبنا من الدق.
نغمض عنينا ونسافر….
ونحب في وهمنا نغرق.
وساعات الغربه تغرينا…..
ولنار الوحده ترمينا…..
وتآكل أحلي مافينا…..
وتاخد من عمرنا وتسرق.
وساعات عيونا تعبي هموم….
ويصرخ فينا صوت مكتوم….
ولما الحب ييجي في يوم….
نلاقي قلوبنا بتشقشق.
وساعات الحب يدبحنا….
ومن بعد الفرح يجرحنا….
وتعيش دبلانه ملامحنا….
وياويلنا من سهمه لو يرشق.
ويادنيا مرمغي فينا….
وبعزم مافيكي إيدينا….
ومهما زرعنا بإيدينا….
بنسقط وملناش ملحق.
بنجري فيكي جري وحوش….
علشان حلم صبح فنكوش….
كما الطاووس بريش منفوش…
ونهري في دمنا ونحرق.
وإمتي نطبطب علي قلوبنا….
وإمتي هنرضي بنصيبنا…..
ويبطل طموحنا يعذبنا…..
بيجري العمر…ياريت نلحق.
