هل تعرف البنت إللي أنا ما باحبّهاش..؟

للأديب الشاعر : سعيد شحاته

(رئيس نادي أدب مطوبس وصاحب مقولة بيت ثقافة بكل قرية)

هل تعرف البنت اللي انا ما باحبّهاش 
إنّ الطريق للقاهره مليان قصايد شعر ع الجنبين
وانّ المريد في القاهره (يوماتي بيروح مرّتين(
…………………..   (م السيّده لسيدنا الحسين)
وانّ الكلام في القاهره مش عن (ياسين)
ولا عن فؤاده اللي اتهرت م الكدّابين 
ولا عن حبيبتي امّ العنين صافيين قوي
ولا عن ولد عاش من وجيعة روحه بالليل يتكوي 
ولا عن جدع عاش منطوي ف وسط الكتير 
اشرب يا بيه في الحرّ كوبّاية خمير 
وادعي بضمير صادق على كلّ الحمير 
…….
هل تعرف البنت اللي انا ما باحبّهاش 
إن الحباش مضروب ف سوق العطارين 
وانّ الطريق للقاهره محتاج يومين 
وانّ المريد في القاهره بينام حزين
وانّ الكلام في القاهره يا فلوس يا دين 
بيزنيس على جتت الغلابه الطيّبين 
تكدب تنول 
لكن تحلّي الكدبه باتناشر يمين 
ترقص تطول 
وجميل إذا ميّلت ع الجنب اليمين 
وغسلت وشّك بالعمى والضحك والخرس المبين
ونسيت دا مين ولمين وامتي وفين وليه
البس يا بيه في الحرّ شبشب وامشي فيه 
علشان تواصل رحلة الشخص السفيه 
……..
هل تعرف البنت اللي انا ما باحبّهاش 
إن البلاش في جيوبي مش عارف بكام 
وانّ الدموع في القاهره راكبين ترام 
وانّ المريد في القاهره بيلبس حِرام
وانّ اسمو إيه في القاهره بياكل حمام 
علشان يقضّي المصلحه ويعرف ينام
وانّ الكلام في القاهره محتاج كلام 
والضحك عايز ضحك خام 
والمُهر لو فكّ اللجام يطلع ما فيش 
شخشخ يا بيه بالفكّه والجبنه القريش 
واشرب عشان كلّ اللي فات كان أكل عيش 
………….
هل تعرف البنت اللي انا ما باحبّهاش 
إن الوشوش مش كلها واحده
وانّ القلوب مش كلها جاحده 
وانّ الطريق للقاهره فنان 
مليان قصايد نُصها ألوان 
وانّ المريد في القاهره شاعر 
لا يهمه خوف سلطان ولا بتنجان 
وان اسمو إيه في القاهره غلبان 
غني يا بيه على دقّة الشارع 
هذا أوان من لم يكُنْلُه أوان 
………….
هل تعرف البنت اللي انا ما باحبّهاش
إن الطريق للقاهره جلاش غنا وتفاريح 
وانّ اسمو إيه في القاهره بتصريح 
وإن الباصات مراجيح
وان القبيح بيحب كل قبيح
…………وان الجمال تفانين
اقعد يا بيه خدلك كوزين كيوي
(محجوب) مدلدل رجله يا (مكيوي(
والقاهره قلابه غلابه
لا يهمها حملان ولا ديابه
صدّق وسوق وارمح ونام واقف
شبحك ما بيخوّفش في الغابه
ملكك في ضهره قصيده وكتابه
وجاموسه وقت الجد حلابه
قرّب يا بيه.. الفول بخمسه جنيه
الجوع مفيد يا بطون يا نصّابه
………
هل تعرف البنت اللي انا ما باحبّهاش
إنّ الطريق للقاهره فدادين 
………… فيها القصايد ورد ع الجنبين
قلب المريد في القاهره فاضي
صمت المريد قاضي القضاه المخلصين 
عاشق وبيروح مرّتين
………………..م السيّده لسيدنا الحسين
عنّاب يا بيه يا ابو عمّه زين 
…….. اقعد ودوق لك شفطتين
قرشين ضعاف اتحرّكوا ف جيبي القماش 
أعزم على البنت اللي انا ما باحبهاش 
…………………….. واللا……. بلاش؟!