مقالات الكُتاب

ماذا فعلت مصر وماذا تفعل الان ؟

كتب:  منصور توفيق

تعالو نفكر شوية …

بعد ما امريكا قررت رفع الفايدة على الايداع ارتفعت نغمة ان مصر هتخرب وهتفلس والاقتصاد هيقع والسيسى صرف فلوس البلد فى كبارى والسوق العقارى والعاصمة ومعملش مشاريع انتاجية ومش هنلاقى ناكل ..

مبدائيا لازم نفهم شوية حاجات ..
اولا …
السوق العقارى هو اللى انقذ مصر فى ٢٠١٤ لانه سوق كثيف العمالة سريع التسويق قليل التكلفة و كل خاماته موجودة ومتوفرة فى مصر من اراضى واسمنت وحديد وخامات بناء

ثانيا …
كل شركات المقاولات حصلو على قروض بخطابات ضمان من الجيش واشتغلو فى كل شبر فى ارض مصر وشغلو الاف الشباب والعمال والموظفين والسواقين فعمل نشاط فى السوق المصرفى بعد.ما كانت البنوك على وشك الاغلاق واعلان الافلاس .. وعملو حركة اموال فى السوق فى البيع والشراء فقلل الركود اللى زاد بعد ٢٠١١..

ثالثا …
المدن السياحية الجديدة فى العالمين وجبل الجلالة و المنصورة الجديدة بجانب المناطق السكانية والتجارية فى العاصمة اتباعت بمليارات قبل ما ينتهى بناها بفضل البروبجندة والدعاية اللى اتعملت حواليها وحققت دخل رفع الاحتياطى النقدى لحد ٦٠ مليار دولار بعدما كان ١٤ مليار فى ٢٠١٤ رغم كل الصرف على تسليح الجيش والشرطة واصلاح وبناء البنية التحتية والتكافل الاجتماعى و مشاريع حياة كريمة …

رابعاً …..
بيقولو ان الدولة لم تعمل حساب على احتمال حدوث ازمات اقتصادية …

مصر يا سيادة عملت اهم خطوتين لتحرير اقتصادها …
اول خطوة ….
تحرير سعر الصرف للتحكم فى السوق المصرفى والقضاء على السوق السودا و اصبح لسوق العملات سعر واحد فى كل مصر تخكمه اليات واضحة ومؤاشرات حقيقية ..

الخطوة التانية ….
الغاء الدعم السلعى واستبداله بالدعم النقدى المباشر لمن يستحق فقط ووقفت اهدار مليارات سنوياً كانت تذهب دعم للاغنياء الاكثر استهلاكا وغير المصريين المقمين فى مصر غير تهريب السلع المدعمة للخارج ..

الخطوتين دول جعلو مصر تحط رجليها فى منطقة الامان الاقتصادى ولولاهما كان زمانا بناكل طوب فعليا من اول ازمة كورونا …

خامساً …
التصنيع ..
لازم نفهم ان التصنيع مش مجرد كلمة او قرار او امنية ده محتاج مقومات
اهمها..
**⬅️ مصادر الطاقة المتوفرة بدون انقطاع زى الكهرباء والغاز والسولار لتشغيل المصانع وضمان عدم توقفها .

**⬅️ الطرق والمحاور المرورية التى تتحمل النقل الثقيل ..

**⬅️الموانى التجارية سوا بحرية او جوية او برية ..
توفير مناخ أمن ومستقر لجذب المستثمرين ..

🔆 والاهم بعد كده نحدد هنصنع ايه وهنسوق فين وهنافس مين وهنوفر الخامات منين .
وكل نقطة من دول محتاجة درسات وخطط وتباديل وتوافيق لتحديد المعطيات المتاحة والمطلوب استهدافه
وده اللى اشتغلت عليه #مصر.🇪🇬 ..

بعد ما وفرت مصر مصادر الطاقة وعملت الطرق والموانى والمناطق الصناعية وقوانين الاستثمار
حددت ممكن تنتج ايه وهتسوقه ازاى واشتغلت على مناطق صناعية متخصصة تتميز بيها مصر ..

مناطق صناعة الاثاث وصناعة الجلود وصناعة الغزل والبتروكيماويات والادوية والاسمدة والرخام والاسمنت والصناعات التكميلية وزراعة الصوب ..

مصر قامت ببناء و بتبنى..
اكبر مصنع غزل ونسيج فى العالم
اكبر مصنع للسكر فى العالم
اكبر مصنع للبتروكيماويات فى العالم
اكبر مصنع لصناعات الرخام والجرانيت فى العالم
اكبر مصانع الاسمنت فى العالم
اهم منطقة لتصنيع الاثات فى العالم .
اهم منطقة لتصنيع الجلود فى العالم
من اهم واكبر مدن الدواء فى العالم

سادسا ….
الانتاج الزراعى والغذاء ..
.مصر من اول ٢٠١٤ اشتغلت على ملف الزراعة وزيادة الرقعة الزراعية و استصلاح الاراضى وخلق ريف مصرى جديد وقدرت تحيى مشروع توشكى وشرق العوينات والواحات وسيناء واخيرا الدلتا الجديدة وحققت السنادى عشرة (١٠) مليون طن قمح.
غير زراعة الصوب الزراعية اللى حقق طفرة فى تصدير الفواكه والخضروات المصرية للخارج.
غير الاهتمام بالريف القديم وتبطين الترع والمصارف الزراعية ونشر طرق الرى الحديث فى الزراعة والتى تقلل استهلاك المياة وتزيد المحصول ..
ايضا انشاء اهم واكبر مزارع الاسماك فى العالم
وانشاء مزارع ماشية وعجول لانتاج اللحوم والالبان وتقليل استيرادها واستخدام العلم فى تحديد السلالات الاكثر انتاجية

سابعاً …
التجارة والاستثمار والسياحة والبناء
انشاء اكبر ميناء بحرى تجارى فى العالم شرق بور سعيد .
اكبر مخازن ومستودعات لوجيستية تجارية فى العالم فى العين السخنة .
اهم منطقة لوجيستية لخدمة السفن التجارية فى العالم داخل منطقة قناة السويس ..
احدث المدن السياحية فى العالم العالمين وجبل الجلالة والمنصورة الجديدة
انشاء مطارات دولية فى الشمال والجنوب لخدمة السياحة والتجارة
انشاء متاحف دولية جديدة للجذب السياحى .
انشاء اكبر مشروع استثمارى عقارى فى العالم وبناء اكتر من ٢ مليون وحدة سكنية لكل المستويات ..
من اول وحدات سكنية لتطوير العشوائيات والريف و وحدات لمحدودى الدخل ومتوسطى الدخل و وحدات متميزة وفاخرة
و بجانب فلل بمستوى عالى ومدن سكنية من الجيل الخامس 5G

مصر قامت بتطوير وتحديث اهم مجرى ملاحى تجارى فى العالم ..

مصر قامت باستخراج الغاز من اهم الحقول المكتشفة فى العالم فى الفترة الاخيرة حقل ظهر .
مصر الدولة الوحيدة فى الشرق الاوسط اللى عندها مصنع تسيل الغاز

مصر الدولة الوحيدة فى الشرق الاوسط اللى بتصدر الطاقة كهرباء وغاز ووقود اخضر

كل اللى انا قولته ده جزء من اللى عملته مصر عشان تقوى اقتصادها واصبح تصنفها الانتمانى من ضعيف (- B ) وخطر لقوى جدا وايجابى ….

كل المشاريع ديه مجرد بعض وجزء صغير مختصر من اللى اتعمل فى مصر من ٢٠١٤ حتى الان ..

واحد ناصح جاى من بعيد يسئل سؤال

المواطن المصرى استفاد ايه من كل ده وايه الفايدة اللى هتعود عليه ؟؟

هقوله بوضوح كل المشاريع ده وقدها الف مرة اتبنت بالديون والقروض الاستثمارية
ولازم المشاريع ده تسدد اقساط القروض اللى اتبنت بيها والباقى يعود على الدولة والمواطن بشكل مباشر لكن الفايدة الغير مباشرة تتلخص فى ..
** خلق فرص عمل سوا من عمال و حرفيين و سواقين وموظفين ومهندسين واداريين .

** تقليل فاتورة الاستيراد وتوفير العملة الصعبة

** .. تقليل عجز الموازنة وتحويله لفائض لتسديد الديون القديمة المتراكمة من عشرات سنين .

** تحويل مصر لنقطة جذب استثمارى وقوة اقليمية ..

** تقليل المخاطر الناتجة من الازمات العالمية والمرور بالبلاد لبر الامان باقل خسائر ممكنة يدوب ترتفع الاسعار بنسبة اقل من نسب ارتفاعها فى باقى الدول حتى الدول الكبرى العظمى اتاثرت بشكل اكبر من مصر ..

الخلاصة اللى #السيسى عمله فى مصر فى فترة قليلة بفضل الله انقذنا من مصير اسود والدخول فى نفق مظلم لن نكن نستطيع الخروج منه ولو بعد ١٠٠ سنة ..
اتقو الله فى بلدكم واشهدو بالحق وساندو بلدكم بضمير مخلص لله وللوطن ..
حفظ الله مصر وشعبها وارضها وجيشها ورئيسها .

بكره أحلى

رئيس مجلس الادارة ورئيس التحرير : وجدى وزيرى

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى