حكاية الشهيد المنسى مع الست والانبوبة

مرة من المرات المعدودة اللي سافرت
فيها مع القائد أما أجازتي توافق مع أجازته وكالعاده كنت استناه في العاشر عند هايبر وان وكنت بسمع منه احلي ضحكة اما اتصل بيه واقوله ايوه يا قائد انا عند هايبر.. ويقولي ماشي ياعم هايبر علي ماجيلك خمس دقايق وهكون قدامك… وفي المرة دي ركبت معاه ومشينا وفضلنا نحكي مع بعض لغاية ما وصلنا في أول الاسماعيليه لقيته خد جنب بالعربيه فبقوله فيه حاجة ياقائد ولا ايه… قالي استني ياعم هنجيب باكو بسكويت ولا حاجة نتسلي واحنا ماشيين…. ونزلنا قدام سوبر ماركت نجيب الحاجة اللي عايزينها واحنا بنجيب الحاجة جات وقفتنا جنب محل أدوات منزلية وشاف واحده ست كبيره في السن وباين عليها الطيبه والشقي وسمع صوت صاحب المحل صوته عالي عليها وبيقولها ياست مينفعش والست بتقوله والنبي يابني دا انا ست غلبانه وقعده هنا جنبك والراجل يقولها ياست مينفعش ويلا بقي اتوكلي علي الله …
طبعا القائد ساب الحاجة وراح علي المحل وأخد الراجل صاحب المحل تحت باطه وقاله تعالي لو سمحت عايزك… فالراجل بص له باستغراب ومشي معاه…..فقاله فيه ايه مالها الست الطيبه دي بتزعألها ليه….. كل دا هو طبعا ميعرفش هو بيكلم مين…. فقاله ياعم دي جايه عايزه أنبوبة بوتاجاز وتدفعلي كل شهر خمسه جنيه.. وبقالي ساعه بقولها مينفعش وهي مفيش فايده… فالقائد قاله طيب براحه عليها هي بكام الانبوبه دي….. تقريبا وقتها كانت ب 300 جنيه فالقائد قاله طيب أدي 300 جنيه واديها الأنبوبه وخد منها ال 5 جنيه وحطها صدقه ليها في الجامع وأما تجيلك تاني قولها أي حاجة ومتاخدش منها فلوس…. فالراجل استغرب اوي وقاله انت تعرفها ولا ايه…. قاله ايوه أعرفها وخيرها مغرقني يلا روح طيب خاطرها واديها الأنبوبه…
ورجعنا علي المحل نجيب حاجتنا وانا نفسي أحضنه…. وركبنا العربيه فبقوله ياقائد والله ربنا هيكرمك من وسع… قالي خليها علي الله ياعم حاتم ……
…ربنا كان بيحطله الخير في طريقه
ربنا كرمك أحسن تكريم ياقائد بس والنبي ياقائد ماتنسانا بدعواتك ان ربنا يجمعنا بيك علي خير في جنات النعيم

منقول من Hatem Nagy