الأحد, أغسطس 18, 2019
الرئيسيةمقالات الكُتابلن تخضع بلادي شعر ايمان الطير
مقالات الكُتاب

لن تخضع بلادي شعر ايمان الطير

حسة ان نِسْرِك بيندبح ليه بس يابلادي
حسة ان زرعك بيرتوي بدم أولادي

هو انتي ليه حظك كدة من القرايب و العدا
ياإما حد بيسرقك يا إما حد بيحرقك

يايخطفوا أطفالك .. يايقتلوا أبطالك
ياييتموا عيالك .. يايموتوا رجالك

ليه ياحبيبتي كل ده ؟!

ماقدرش اقول انك ضعيفة
وانا اللي منك باسْتَمِدْ قوتي
ماقدرش اقول انك زَليلَة
وانتي الشُّموخ كله في حياتي ودُنيتي

ماقدرش اقول انك فقيرة
وانتي اللي خير الكون ده كله
كان في خزاينك قبل أهلك
ماياكلوا خيرك ويستبيحوا لُقْمِتي

ياترى انتي مرصودة
والا انتي محسودة

محسودة على صبرك
مهو إنتي آه صابرة
والا على قَدْرِك
مهو إنتي آه قادرة

إنتي اللي صابرة عالألم وحابسة مليون آآآآه
وانتي اللي قادرة تنتقم بالحق قبل الجاه
إنتي اللي عِلْمِك في الكون ده كله
في العقل والكُراس
وانتي اللي أدَبِك كله وتاريخك
بيدرسوه الناس

والا تكوني ياغالية على عِزِّتك محسودة
واهي دي بأة بالذات طول الوجود موجودة
والا لأنك لحالك واقفة وصالبة العود
واللي يحاول يهدك تحت البيادة يِدُود

طيب قوليلي ياغالية بالله إيه العمل
دانتي اللي فيكي الكل حاطط الأمل
وانتي اللي ساندين عليكي والله كأنك جبل

بالطبع ممكن تِمْرَضِي
أو حتى تبكي وتحزني
لكن اللي مش ممكن أَبَدْ
إنك يامصر تخضعي
أو ييجي يوم وتنحني ..

بكره أحلى
رئيس مجلس الادارة ورئيس التحرير : وجدى وزيرى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

التخطي إلى شريط الأدوات